തൊഴിലധിഷ്ഠിത വിദ്യാഭ്യാസം: പ്രസക്തിയും പ്രാധാന്യവും

തൊഴിലധിഷ്ഠിത വിദ്യാഭ്യാസം: പ്രസക്തിയും പ്രാധാന്യവും

വിദ്യാസമ്പന്നരിൽ തൊഴിലില്ലായ്മ രൂക്ഷമായ നാടാണ് കേരളം.കേരളത്തിലെയും അന്യസംസ്ഥാനങ്ങളിലെയും സ്ഥാപനങ്ങളിൽനിന്ന് ഉന്നത സാങ്കേതികവിദ്യാഭ്യാസം നേടിയവരുടെ അനുപാ‍തം  ആമേഖലകളിലുള്ള തൊഴിലവസരങ്ങളേക്കാൾ കൂടുതലാകുന്നതും തൊഴിലില്ലായ്മയുടെ ആക്കം കൂട്ടുന്നു. അതുകൊണ്ടുതന്നെ ഇതിന് താഴോട്ടുള്ള തൊഴിൽ മേഖലകൾക്ക് ആവശ്യമായ തൊഴിൽ വൈദഗ്ധ്യം നേടിയവരുടെ എണ്ണം തുലോം കുറയുകയും ചെയ്യുന്നു. ഇത് സംസ്ഥാനത്തിന്റെ വികസനത്തിന് പലവിധത്തിലും ആഘാതം സ്യഷ്ടിക്കുന്നു. ഇതിനൊരു പരിഹാരം എന്ന നിലയിലാണ് കേരളത്തിൽ ഹയർസെക്കന്ററി നിലവാരത്തിൽ തൊഴിലതിഷ്ഠിത വിദ്യാഭ്യാസം നിലവിൽ വന്നത്.

എഞ്ചിനീയറിംഗ് & ടെക്നോളജി, അഗ്രികൾച്ചർ, മ്യഗസംരക്ഷണം, പാരാമെഡിക്കൽ, ഫിസിക്കൽ എഡ്യൂക്കേഷൻ, ഹോം സയൻസ്, ഹ്യുമാനിറ്റീസ്, ബിസിനസ് & കൊമേഴ്സ് എന്നീ വിഭാഗങ്ങളിലായി 42-ഓളം കോഴ്സുകൾ വി.എച്ച്.എസ്.ഇ യിൽ നടന്നു വരുന്നു.10-ആം ക്ലാസോ തത്തുല്യമോ ആണ് വി.എച്ച്.എസ്.ഇ പ്രവേശനത്തിനുള്ള യോഗ്യത. രണ്ട് വർഷം ദൈർഘ്യമുള്ള ഈ കോഴ്സിൽ ചേരുന്ന വിദ്യാർത്ഥികൾക്ക് മേൽ‌പ്പറഞ്ഞവയിൽ നിന്നും അവരവരുടെ അഭിരുചിക്ക് അനുയോജ്യമാ‍യ കോഴ്സുകൾ തെരഞ്ഞെടുക്കാം. ഈ തൊഴിലിനോടൊപ്പം +2 വിഷയങ്ങളും ഉൾപ്പെടുത്തിയിട്ടുണ്ട്. കൂടാതെ സ്കൂളുകളിൽ P.T.C(പ്രൊഡക്ഷൻ കം ട്രെയിനിംഗ് സെന്റർ) എന്ന പേരിൽ അതാത് മേഖലകളിൽ പരിശീലനവും നൽകുന്നു.

കൂടുതൽ വിദഗ്ദ്ധ പരിശീലനത്തിനായി കോഴ്സിന്റെ അവസാനം O.J.T(ഓൺ ദ  ജോബ് ട്രെയിനിംഗ്) എന്ന പേരിൽ ഒരു പരിശീലന പരിപാടിയും ഇതിൽ ഉൾപ്പെടുത്തിയിരിക്കുന്നു. ഒരോ മേഖലയിലും പ്രശംസനീയമായ രീതിയിൽ ഏറ്റവും വൈദഗ്ധ്യത്തോടെ പ്രവർത്തിക്കുന്ന സ്ഥാപനങ്ങളിലാണ് ഈ പരിശീലനം നൽകുന്നത്. ഒപ്പം N.S.S, N.C.C, കരിയർ ഗൈഡൻസ് & കൌൺസിലിംഗ് സെന്റർ, A.H.E.P എന്നിവയും ഈ പാഠ്യപദ്ധതിയുടെ ഭാഗമായി നടന്നുവരുന്നു.

വിദ്യാർഥികൾക്ക് അവരവരുടെ കഴിവുകൾ പ്രകടിപ്പിക്കുന്നതിനായി അവർ നിർമ്മിക്കുന്ന ഉൽ‌പ്പന്നങ്ങളുടെ പ്രദർശനവും വിൽ‌പ്പനയും ഉൾപ്പെടുത്തിക്കൊണ്ട് ‘വൊക്കേഷണൽ എക്സ്പോ’എന്ന പരിപാടി വർഷംതോറും റീജിയണൽ തലത്തിലും സംസ്ഥനതലത്തിലും നടന്നുവരുന്നുണ്ട്. ഒരു തൊഴിൽ പഠിച്ച് പുറത്ത് വരുന്ന ഒരാൾക്ക് ആ മേഖലയിൽ സ്വന്തമായി പ്രവർത്തിക്കാനുള്ള സഹായത്തിനായി G.F.C(ജനറൽ ഫൌണ്ടേഷൻ കോഴ്സ്) എന്ന വിഷയവും ഇതിൽ ഉൾപ്പെടുത്തിയിരിക്കുന്നു. ഇത് ഇന്നത്തെ മത്സരം നിറഞ്ഞ വിപണിയിൽ വിജയകരമായി ഒരു സ്ഥാപനം നടത്തിക്കൊണ്ടു പോകാൻ വിദ്യാർത്ഥികളെ  സഹായിക്കുന്നു. V.H.S.E പാസ്സാകുന്നവർക്ക് എഞ്ചിനീയറിംഗ് & ടെക്നോളജി, പാരാമെഡിക്കൽ തുടങ്ങിയ ബ്രാ‍ഞ്ചുകളിൽ ഡിപ്ലോമ കോഴ്സുകൾക്ക് സീറ്റ് സംവരണവും ഏർപ്പെടുത്തിയിട്ടുണ്ട്.

V.H.S.E പാസ്സാകുന്നവർക്ക് വിവിധ സ്ഥാപനങ്ങളീൽ അപ്രന്റീസ് ട്രെയിനിംഗിനുള്ള സൌകര്യവും ക്യാമ്പസ് സെലക്ഷനിലൂടെ വിവിധ സ്ഥാപനങ്ങളിൽ ജോലി നേടാനുള്ള അവസരവും ഉണ്ട്. അതായത് വിജയകരമായി V.H.S.E കോഴ്സ് പൂർത്തിയാക്കുന്ന ഒരു വിദ്യാർഥി ഉപരിപഠനത്തിനുള്ള യോഗ്യത നേടുന്നതിനോടൊപ്പം സ്വന്തമായി ഒരു തൊഴിൽ ചെയ്യാൻ പ്രാപ്തി നേടുകയും ചെയ്യുന്നു. ഇന്നത്തെ സാമൂഹിക സാഹചര്യങ്ങൾ വിലയിരുത്തുമ്പോൾ  ഹയർസെക്കന്ററി  തലത്തിൽ കേരളത്തിൽ നിലവിലുള്ള വിദ്യാഭ്യാസ രീതികളിൽ ഏറ്റവും മികച്ചത് ഇതാണെന്ന് നിസംശയം പറയാം. പക്ഷേ, ഇന്ന് കേരളത്തിൽ ഇതിനുള്ള സ്ഥാനം പുറകിലാണെന്ന് പറയാതെ വയ്യ. ഈ വിദ്യാഭ്യാസരീതിയെക്കുറിച്ചും, ഇതിന്റെ ഗുണഫലങ്ങളെക്കുറിച്ചും വിദ്യാർഥികൾക്കും, രക്ഷിതാക്കൾക്കും വേണ്ടത്ര അവബോധമില്ലാത്തതാണ് ഇതിനു പ്രധാനകാരണം. 

V.H.S.E എന്നാൽ വേണ്ടാത്ത ഹയർ സെക്കന്ററി എന്ന ഒരു പ്രചരണം തമാശയായിട്ടാണെങ്കിലും നടക്കുന്നുണ്ട്. എന്നാൽ സാധാരണ പ്ലസ് ടൂ‍ കോഴ്സിനേക്കാൾ കുട്ടികൾക്ക് ഏറെ പ്രയോജനകരമാണ് വി.എച്ച്.എസ്.ഇ എന്ന്  കുട്ടികൾക്കും രക്ഷകർത്താക്കൾക്കും ഇനിയും വേണ്ടത്ര അവബോധം ഉണ്ടായിട്ടില്ല. ഈ  യാഥാർത്ഥ്യം മനസ്സിലാക്കി   തൊഴിലധിഷ്ഠിത ഹയർ സെക്കണ്ടറിയുടെ പ്രാധാന്യം സംബന്ധിച്ച് കൂടുതൽ പ്രചാരം നൽകാൻ ഫലപ്രദമായ നടപടികൾ ഉണ്ടാകേണ്ടിയിരിക്കുന്നു.

അയിത്തം സവർണ്ണ മനസ്സിനോ ദൈവത്തിനോ..?????

അയിത്തം സവർണ്ണ മനസ്സിനോ ദൈവത്തിനോ..?????

സാംസ്ക്കാരിക കേരളത്തിനാകെ അപമാനകരമായ ഒരു വാർത്തയാണ് വടക്കൻ കേരളത്തിലെ ചില ക്ഷേത്രങ്ങളിൽ അയിത്തവും ജാതി വിവേചനവും നിലനിൽക്കുന്നതായുള്ള മനുഷ്യാവകാശ കമ്മീഷൻ നിരീക്ഷണം.അയിത്തം നിയമം മൂലം നിരോധിച്ച് അര നൂറ്റാണ്ടിന് ശേഷമാണ് ഈ അഭിപ്രായം എന്നത് നമ്മുടെ നാണക്കേട് വർധിപ്പിക്കുന്നു.ഇതിന് എതിരെ സർക്കരും മലബാർ ദേവസ്വം ബോർഡും നടപടി എടുക്കണമെന്ന് കമ്മീഷൻ അംഗം ശ്രീ.ഇ.കെ ഗംഗാധരൻ ആവശ്യപ്പെട്ടു.

തളിപ്പറമ്പ് രാജരാജേശ്വരി ക്ഷേത്രം,കാഞ്ഞിരങ്ങാട് വൈദ്യനാഥ ക്ഷേത്രം എന്നിവിടങ്ങളിൽ ഭക്തരോട് ജാതിവിവേചനം കാണിക്കുന്നതായി മാങ്ങാട് സ്വദേശി ചന്ദ്രൻ നൽകിയ പരാതിയിലാണ് ഈ അഭിപ്രായം.രാജരാജേശ്വരി ക്ഷേത്രത്തിൽ പുഷ്പാഞലി പ്രസാദം ബ്രാമണർക്ക് കൈയ്യിൽ വച്ചു കൊടുക്കുമ്പോൾ മറ്റുള്ളവർക്ക് തറയിൽ വച്ചു കൊടുക്കുന്നതായാണ് പ്രധാന പരാതി.സോപാനപ്പടിയിൽ പ്രാർഥിക്കാൻ ബ്രാമണരെ മാത്രമേ അനുവദിക്കാറുള്ളൂ.കളഭാഭിഷേക സമയത്ത് ബ്രാമണരല്ലാത്തവരെ നാലമ്പലത്തിനുള്ളിൽ പ്രവേശിപ്പിക്കുന്നുമില്ല.

ഇതിനെക്കുറിച്ച് കമ്മീഷന് ദേവസ്വം കമ്മീഷണർ നൽകിയ വിശദീകരണം അപഹാസ്യമാണ്.ഈ റിപ്പോർട്ടിൽ രാജരാജേശ്വരീ ക്ഷേത്രം എക്സിക്യൂട്ടീവ് ഓഫീസറുടെ വിശദീകരണവും ഉൾപ്പെടുത്തിയിട്ടുണ്ട്.ബ്രാമണർക്ക് ഇവിടങ്ങളിൽ ലഭിക്കുന്ന പ്രത്യേക അവകാശങ്ങളെ ഈ റിപ്പോർട്ടിൽ ന്യായീകരിക്കുന്നു.നിലവിലുള്ള ആചാര അനുഷ്ടാനങ്ങളിൽ മാറ്റം വരുത്തുന്നത് ദൈവഹിതം അറിഞ്ഞും തന്ത്രിമാരുടെ നിർദേശപ്രകാരവും ആയിരിക്കണമെന്ന് റിപ്പോർട്ടിൽ പറയുന്നു.പ്രസാദം നൽകുമ്പോൽ അബ്രാമണരുടെ ശരീരത്തിൽ സ്പർശിച്ചാൽ അശുദ്ധി വരുമെന്ന അദ്ദേഹത്തിന്റെ ന്യായം വളരെ വളരെ അപഹാസ്യമാണ്.പിന്നെ ഈ അശുദ്ദ്ധി മാറാൻ പുണ്യാഹം വേണമത്രേ.ഈ നൂറ്റാണ്ടിലും ഇത്തരം വാദങ്ങൾ ബാലിശമാണെന്ന് പറയാതെ വയ്യ.

അബ്രാമണരോട് ഇതുപോലെ ചില കാര്യങ്ങളിൽ മാത്രമേ ഇവർക്ക് അയിത്തമുള്ളൂ.അവരെ തൊട്ടാൽ അയിത്തം,അവർ തൊട്ട ദക്ഷിണയ്ക്ക് അയിത്തമില്ല.അതു പണമല്ലേ…. നാലമ്പലത്തിനുള്ളിൽ കയറാൻ പാടില്ല.അവർ നൽകുന്ന പണം കമ്മറ്റിക്കാർക്ക് വേണം.ഇത്തരക്കരുടെ പണം സ്വീകരിക്കാമോ എന്നറിയാൻ ഇവരെന്തേ തന്ത്രിമാരുടെ വിദഗ്ധ ആഭിപ്രായവും,ദൈവഹിതമറിയാൻ ദേവപ്രശ്നവും നടത്താത്തത്….,അബ്രാമണരോട് അയിത്തം കാണിക്കുന്ന ഇവർ ഇത്തരക്കാരുടെ പണം നമുക്ക് വേണ്ട എന്നു പറയാനുള്ള ആർജ്ജവം കാണിക്കണം.അല്ലാതെ ഇത്തരം മുട്ടാപ്പോക്കുകൾ പറയുകയല്ല.

വീണ്ടും ചില സംശയങ്ങൾ കൂടി തോന്നുന്നു.ഈ ക്ഷേത്രങ്ങളിൽ വരുന്നവരുടെ ജാതി സർട്ടിഫിക്കറ്റ് പരിശോധിക്കുമോ,അതോ അബ്രാമണരെ തിരിച്ചറിയാനുള്ള ദിവ്യശക്തി ഇവിടുത്തെ ജീവനക്കാ‍ർക്കുണ്ടോ??? യേശുദാസിന് ഗുരുവായൂരിൽ പ്രവേശനമില്ല,എന്നാ‍ൽ അദ്ദേഹത്തിന്റെ പാട്ടുകളവിടെ എല്ലയ്പ്പോഴും കേൾക്കുന്നു.ഇത്തരം സാമൂഹിക അസമത്വങ്ങൾക്കെതിരെ നാം പ്രതികരിക്കേണ്ട സമയം അതിക്രമിച്ചിരിക്കുന്നു…………

ഔഷധസസ്യങ്ങളെ അറിയുക

ഔഷധസസ്യങ്ങളെ  അറിയുക

ഇന്ന് നാം ജീവിക്കുന്നത് കമ്പ്യൂട്ടർ യുഗത്തിലാണ്. ശാസ്ത്രത്തിന്റെ വികാസം മാനവരാശിയ്ക്കു് നേടിത്തന്ന പുരോഗതി നമുക്കെല്ലാം അറിയാവുന്നതാണ്. എല്ലാരംഗങ്ങളിലുമെന്ന പോലെ ആരോഗ്യരംഗത്തും അതിന്റെ സ്വാധീനം പ്രകടമാണ്. എന്നാൽ ഇവിടെ നാം ചിന്തിക്കേണ്ട ചില വസ്തുതകളുണ്ട്. അവ നാം മനസ്സിലാക്കാതിരിക്കുകയോ അഥവാ മനസ്സിലായാൽത്തന്നെ സൌകര്യപൂർവ്വം മറക്കുകയോ ആണ് ചെയ്യുന്നത്. അതായത് അടുത്തകാലത്തായി കേരളത്തിൽ പടർന്നുപിടിയ്ക്കുന്ന ചില രോഗങ്ങളെക്കുറിച്ചാണ്  ഇവിടെ ഉദ്ദേശിക്കുന്നത്.

കുറച്ചുകാലം മുമ്പ് നമ്മളെ വളരെയധികം ബുദ്ധിമുട്ടിച്ച ഒന്നാണ് ചിക്കുൻ ഗുനിയ. അതിന്റെ നിയന്ത്രണത്തിനുവേണ്ടി നമുക്ക് ചെലവഴിക്കേണ്ടിവന്നത് വളരെയധികം പണമാണ്. തുടർന്ന് വിചിത്രമായ പേരുകളിൽ പലരോഗങ്ങളും നമുക്കിടയിൽ പടർന്നു പിടിച്ചു. തക്കാളിപ്പനി തുടങ്ങി ഇപ്പോൾ കേരളത്തിൽ പടർന്നുപിടിച്ചുകൊണ്ടിരിക്കുന്ന ഡങ്കിപ്പനിവരെ ഇതിൽ‌പ്പെടും. എന്നാൽ മുമ്പ് ചിക്കുൻ ഗുനിയ പടർന്നു പിടിച്ചപ്പോൾ പലരും കമ്മ്യൂണിസ്റ്റ്പച്ച എന്ന ചെടി ഇതിനെതിരെ പ്രതിവിധിയായി ഉപയോഗിച്ചു. ഇപ്പോൾത്തന്നെ കഴിഞ്ഞ കുറച്ച് ദിവസങ്ങളായി നാം കേൾക്കുന്ന  ഒന്നാണ് ഡങ്കിപ്പനിയ്ക്കെതിരെ പപ്പായയുടെ ഇല ഔഷധമായി ഉപയോഗിക്കാം എന്നത്. എന്നാൽ നമ്മളിൽ പലർക്കും ഇപ്പോഴും ഇത് അവിശ്വസനീയമായിട്ടാണ് തോന്നുന്നത്. കാരണം നമുക്ക് പ്രിയം പടിഞ്ഞാറൻ സംസ്കാരത്തിന്റെ പുറകെ പോകാനാണ്.

എന്നാൽ നാം മനസിലക്കേണ്ട ഒന്നുണ്ട്. നമ്മുടെ തൊട്ടയൽ സംസ്ഥാനമായ തമിഴ്നാട്ടിൽ പപ്പായയുടെ ഗുണം മുമ്പേ മനസിലാക്കുകയും അവിടത്തെ സർക്കാർ സംവിധാനം ഉപയോഗിച്ച് അതിന്റെ ഗുണഗണങ്ങളെക്കുറിച്ച് ജനങ്ങളെ ബോധവൽക്കരിക്കുകയും ചെയ്തു. നമുക്ക് ചുറ്റും കാണുന്ന നമുക്ക് നിസ്സാരമെന്ന് തോന്നുന്ന സസ്യങ്ങളിൽ ഇന്ന് നാം നേരിടുന്ന പല രോഗങ്ങൾക്കുമുള്ള പരിഹാരമുണ്ട്. പക്ഷെ നാം അത് ഗൌരവമയി എടുക്കണം. ഞാൻ ഈ കുറിപ്പെഴുതാനുള്ള കാ‍രണംതന്നെ അതാണ്. തുമ്പ എന്ന സസ്യത്തെക്കുറിച്ചറിയാത്ത തലമുറയാണിപ്പോൾ ഉള്ളത്. ഈ കുറിപ്പ് വായിക്കുന്ന ആൾക്കാർ നിങ്ങൾ ആരൊക്കെയാണെന്ന് എനിക്കറിയില്ല. നിങ്ങളുടെ കുട്ടികൾക്കെങ്കിലും നിങ്ങൾ ഇത് പകർന്നു നൽകണം. അല്ലെങ്കിൽ അമൂല്യമായ പല അറിവുകളും നമ്മുടെ പുതുതലമുറയ്ക്ക് നഷ്ടമാകും.

നമുക്ക് ചുറ്റും കാണുന്ന അപ്രധാനമെന്ന് കരുതുന്നതും എന്നാൽ ഏറെ ഔഷധപ്രാധാന്യമുള്ളതുമായ  ചില സസ്യങ്ങളെ പരിചയപ്പെടുത്താനാണ് ഈ കുറിപ്പിലൂടെ ഞാൻ ശ്രമിക്കുന്നത്. ഇതുകൊണ്ട് ഒരാൾക്കെങ്കിലും ഗുണമുണ്ടായാൽ ഞാൻ സംതൃപ്തനാണ്. ഈ കുറിപ്പ് തയ്യാറാക്കുന്നതിന് പല ഗ്രന്ഥങ്ങളെയും വിദഗ്ദ്ധരെയും അവലംബമാക്കിയിട്ടുണ്ട്.

തുളസി






കൃഷ്ണതുളസിയെന്നും രാമതുളസി എന്നും തുളസിയെ രണ്ടായി തിരിക്കാം. ലാമിയേസി കുടുംബത്തിൽ‌പ്പെട്ട ഇവയുടെ ശാസ്ത്രനാമം യഥാക്രമം ഒസിമം സാങ്റ്റം, ഒസിമം ടെനിഫ്ലോറം എന്നിങ്ങനെയാണ്. സംസ്കൃതത്തിൽ മാഞ്‌ജരീ: എന്നും തമിഴിൽ തുളചി എന്നും അറിയപ്പെടുന്ന ഇത് ഇന്ത്യയിൽ ഉടനീളം കണ്ടുവരുന്നു. അര മീറ്റർ മുതൽ ഒരു മീറ്റർ വരെ ഉയരത്തിൽ വളരുന്ന ഇവയിൽ ബാസിൻ കാംഫർ എന്ന എസ്സെൻസാണ് പ്രധാന ഘടകം.

ജ്വരം, ഹൃദ്‌രോഗം, ശ്വാസ-കാസ രോഗങ്ങൾ (ചുമയും മറ്റും) എന്നിവയ്ക്ക് ഇവ ഉത്തമ ഔഷധമാണ്. അതുപോലെ തേൾ വിഷം പോലുള്ള ചില വിഷങ്ങൾക്ക് പ്രതിവിഷം എന്ന രീതിയിലും ഇത് ഉപയോഗിക്കുന്നു. വാതത്തെ നശിപ്പിക്കുന്നതും മൂത്രം വർദ്ധിപ്പിക്കുന്നതുമായ ഇത് പലതരം ത്വക്ക് രോഗങ്ങൾക്കും ഉള്ള മരുന്നാണ്. ഇലയും പൂവും ചിലപ്പോൾ സമൂലമായും ആയുർ‌വേദത്തിൽ ഉപയോഗിക്കുന്നു. മഞ്ഞപ്പിത്തം, മലേറിയ, വയറുകടി തുടങ്ങി സ്മാൾ പോക്സ്, ചിക്കൻ പോക്സ് എന്നിവയ്ക്കുവരെ തുളസി ഔഷധമായി ഉപയോഗിക്കുന്നു.

കുടങ്ങൽ






നമ്മുടെ നാട്ടിൻ‌പുറങ്ങളിൽ സാധാരണയയി കാണപ്പെടുന്ന ഒരു സസ്യമാണ് കുടങ്ങൽ. ഈർപ്പവും തണലും ഉള്ള പ്രദേശങ്ങളിൽ ധാരാളമായി കാണപ്പെടുന്നു. എപിയേസി കുടുംബത്തിൽ‌പ്പെട്ട ഇതിന്റെ ശാസ്ത്രനാമം സെന്റല്ലാ ഏഷ്യാറ്റിക്ക എന്നാണ്. ഇംഗ്ലീഷിൽ ഇന്ത്യൻ പെനിവർട്ട് എന്നും സംസ്കൃതത്തിൽ മണ്ഡൂകപർണ്ണികാ എന്നും അറിയപ്പെടുന്നു. ഇത് നിലത്ത് പടർന്നുവളരുന്ന ഒരു ഓഷധിയാണ്. അമിനോ ആസിഡുകൾ, ഗ്ലൈസിൻ, ഗ്ലൂട്ടാമിക്ക് ആസിഡ് തുടങ്ങി ധാരാളം ഘടകങ്ങൾ ഇതിൽ അടങ്ങിയിരിക്കുന്നു. ആയൂർവ്വേദത്തിൽ രസായന ഔഷധമായി ഉപയോഗിക്കുന്നു. തലച്ചോറിലെ ഞരമ്പുകളെ ശക്തിപ്പെടുത്താനുള്ള കഴിവ് ഇതിനുണ്ട്. ബുദ്ധിയും ഓർമ്മശക്തിയും വർദ്ധിപ്പിക്കുകയും ഹൃദയത്തിന്റെ സങ്കോച-വികാ‍സ ക്ഷമത വർദ്ധിപ്പിക്കുകയും ചെയ്യുന്നു. കൂടാതെ അപസ്മാര ചികിത്സയിലും ചർമ്മ രോഗങ്ങൾക്കും ഹൃദ്‌രോഗം പ്രമേഹം തുടങ്ങിയ അസുഖങ്ങൾക്കും ഈ ഔഷധം ഉപയോഗിച്ച് വരുന്നു.

കടലാടി



അമരാന്തേസി കുടുംബത്തിൽ‌പ്പെട്ട ഇതിന്റെ ശാസ്ത്രനാമം അക്കിരാന്തെസ് ആസ്പര എന്നാണ്. എന്നാൽ ഇതേ കുടുംബത്തിൽ‌പ്പെട്ട സയാതുലാ പ്രോസ്ട്രേറ്റ എന്ന സസ്യം ചെറുകടലാടി എന്നറിയപ്പെടുന്നു. ഇംഗ്ലീഷിൽ പ്രിക്ക്‌‌‌‌ലി ചാഫ് ഫ്ലവർ എന്നും സംസ്കൃതത്തിൽ ശിഖരി എന്നും അറിയപ്പെടുന്ന ഇത് വരണ്ട ഉഷ്ണ മേഖലാ പ്രദേശങ്ങളിൽ കാണപ്പെടുന്നു. അര മീറ്റർ മുതൽ ഒരു മീറ്റർ വരെ ഉയരത്തിൽ കാണപ്പെടുന്നു. വേര്, ഫലം, എന്നിവയും ചിലപ്പോൾ
സമൂലമായിത്തന്നെയും  ഔഷധമായി ഉപയോഗിക്കുന്നു. അതിസാ‍രം, നീർവീക്കം, ചെവിവേദന, വയറുവേദന എന്നിവയ്ക്ക് ഈ സസ്യം ഉപയോഗിക്കുന്നു. ചില പ്രദേശങ്ങളിൽ പാമ്പുകടി ഏറ്റാൽ കടലാടിയുടെ പൂങ്കുലയും അരിയും കൂടി അരച്ച് പുറമേ പുരട്ടാൻ ഉപയോഗിക്കുന്നു. വിഷത്തിന്റെ വീര്യം കുറയ്ക്കാൻ ഇത് സഹായിക്കുന്നു.

ആനച്ചുവടി





പേരു സൂചിപ്പിക്കും പോലെ ആനയുടെ പാദം ഭൂമിയിൽ പതിഞ്ഞപോലെ തോന്നുന്ന വിധത്തിൽ വളരുന്ന ചെടിയാണിത്. പശുവിന്റെ നാക്കുപോലുള്ള ഇലകളാണ് ഗോ ജിഹ്വാ എന്ന സംസ്കൃത നാമം ഇതിനു ലഭിക്കാൻ കാരണം. ആസ്റ്ററേസി കുടുംബത്തിൽ‌പ്പെട്ട ഇതിന്റെ ശാസ്ത്ര നാമം എലഫന്റോപസ് സ്കാബർ എന്നാണ്. ഇംഗ്ലീഷിൽ പ്രിക്ക് ലി ലീവ്ഡ് എലഫന്റ് ഫൂട്ട് എന്നാണ്. നമ്മുടെ നാട്ടിൽ സാധാരണയായി കണപ്പെടുന്ന ഇത് നിലം പറ്റി വളരുന്ന ഒരു ഓഷധിയാണ്. അയൺ, മഗ്നീഷ്യം, സോഡിയം, പൊട്ടാസ്യം, കാത്സ്യം എന്നിവ ഇതിലടങ്ങിയിരിക്കുന്നു. ഇതിന്റെ എല്ലാ ഭാഗങ്ങളും ഔഷധമായി ഉപയോഗിക്കുന്നു. ശരീര താപം നിയന്ത്രിക്കാനും ചുമ. ഹൃദ്‌രോഗം എന്നിവയ്ക്കും ഉത്തമമാണ്. മലബന്ധമുണ്ടാക്കാൻ കഴിവുള്ള ഈ സസ്യം വിഷഹാരിയായും ഉപയോഗിക്കുന്നു. താളിയായി തലയിൽ തേച്ചാൽ താരനും മുടികൊഴിച്ചിലും മാറും.

ചെറൂള (ബലിപ്പൂവ്)


പേരു സൂചിപ്പിക്കും പോലെ ഹിന്ദുമതത്തിൽ മരണാനന്തര ചടങ്ങുകൾക്ക് ഇത് ഉപയോഗിക്കുന്നു. ഉഷ്ണമേഖലാ പ്രദേശങ്ങളിൽ സാധാരണയായി കാ‍ണപ്പെടുന്ന ഇത് അരമീറ്റർ വരെ ഉയരത്തിൽ വളരുന്ന ഒരു ഓഷധിയാണ്. അമരാന്തേസി കുടുംബത്തിൽ പെടുന്ന ഇതിന്റെ ശാസ്ത്ര നാമം ഏർവ ലനേറ്റ എന്നാണ്. മൂത്രാശയക്കല്ലിനെ നശിപ്പിക്കാനുള്ള കഴിവ് ഇതിനുണ്ട്. മറ്റു മരുന്നുകളോടൊപ്പം ചേർത്ത് പ്രമേഹത്തിനെതിരെയും ഉപയോഗിക്കുന്നു. സ്ത്രീകൾക്ക് ഗർഭകാലത്തുണ്ടാകുന്ന രക്തസ്രാവം ശമിപ്പിക്കാൻ കഴിവുള്ള ഇത് ഒരു കൃമി നാശകം കൂടിയാണ്.

(ചിത്രങ്ങൾക്ക് ഗൂഗിളിനോട് കടപ്പാട്)

പുതിയൊരു ബ്ലോഗ്ഗർ

പുതിയൊരു ബ്ലോഗർ 

ഒരു ബ്ലോഗ് തുടങ്ങുകയാണ്. ബ്ലോഗ്ഗർ ഇ.എ.സജിം തട്ടത്തുമലയ്ക്ക് നന്ദി! അദ്ദേഹമാണ് ഈ ബ്ലോഗ് തുടങ്ങിത്തന്നത്. പ്രാഥമികപാഠങ്ങളും കഴിഞ്ഞു. എങ്കിലും ഇനിയും എറെ പഠിക്കാനുണ്ട്. തൽക്കാലം ഫോട്ടോകളൊക്കെ ഇട്ട് തുടങ്ങാം. സ്വന്തം രചനകൾ ഒക്കെ ഇടണമെങ്കിൽ എഴുതാൻ  അല്പം വിവരവും ഭാവനയുമൊക്കെ വേണം. ഇല്ലാത്തതും ഇതു രണ്ടും തന്നെ.   വിവരം അല്പാല്പം ഉണ്ടാക്കാൻ ശ്രമിക്കാം. പിന്നെ ഭാവന. അതും ഇപ്പോൾ കൃത്രിമമായി ഉണ്ടാക്കുകയേ നിവൃത്തിയുള്ളൂ. ഉണ്ടാക്കുകതന്നെ. ബ്ലോഗിൽ വന്നാൽ ഇതൊക്കെ താനേ വരുമെന്നും കേൾക്കുന്നു. എങ്കില്പിന്നെ  ഒരു കൈ നോക്കുകതന്നെ. ചുരുക്കി പറയാം. ബൂലോകർ ഇനി എന്നെയും സഹിക്കുകയേ നിവൃത്തിയുള്ളൂ. അനുഗ്രഹിച്ചാലും.